અહો આશ્ચર્યમ…!!! અમદાવાદ મેટ્રો રેલ પ્રોજેક્ટમાં નાગરિકો માટે પાર્કિંગની સુવિધા જ આપવાનું ભૂલાય ગયું…!!!

પ્રધાનમંત્રી નરેન્દ્ર મોદીના ડ્રિમ પ્રોજેક્ટ મેટ્રો રેલ ફેઝ વનની તૈયારીઓ પૂરજોશમાં ચાલી રહી છે. અમદાવાદમાં રૂપિયા 10 હજાર કરોડના ખર્ચે મેટ્રો રેલ પ્રોજેક્ટ હાલ ટ્રાયલ પર ચાલી રહ્યો છે. જે ઓગસ્ટ 2022માં શરૂ થવાના એંધાણ દેખાઈ રહ્યા છે. પરંતુ ઉતાવળે પ્રોજેક્ટ શરૂ કરવાના ચક્કરમાં મોટો ડખો થઈ ગયો છે. જે બાદ અમદાવાદ મ્યુનિસિપલ કોર્પોરેશન અને ગુજરાત મેટ્રો રેલ કોર્પોરેશન એક બીજાના સામ-સામે આવી ગયા છે.

પીએમ મોદીના 10 હજાર કરોડના ડ્રિમ મેટ્રો રેલ પ્રોજેક્ટમાં મોટી ભૂલ થઈ ગઈ છે. જેના કારણે ગુજરાત મેટ્રો રેલ કોર્પોરેશન અને મ્યુનિસિપલ કોર્પોરેશન એક બીજા પર ભૂલનો ટોપલો નાંખી રહ્યા છે. મેટ્રો રેલ પ્રોજેકટની કામગીરી પૂર્ણ થાવાને આરે છે ત્યારે પ્રોજેક્ટમાં નાગરિકો માટે પાર્કિંગની સુવિધા જ આપવાનું ભૂલી ગયા છે. આ અંગે ગુજરાત મેટ્રો રેલ કોર્પોરેશનનું કહેવું છે કે અમારું કામ માત્ર મેટ્રોને બનાવીને અને તેને ચલાવવાનું છે. પાર્કિંગની સમસ્યામાં અમે શા માટે પડીએ આ કામ સ્થાનિક બોડીએ જોવાનું હોય છે. નોંધનીય છે કે પાર્કિંગની સુવિધા ઉભી કરવામાં ન આવે તો કરોડોના ખર્ચે બની રહેલા અમદાવાદ મેટ્રો પ્રોજેક્ટ પણ BRTS પ્રોજેક્ટની જેમ ફેલ થશે.

મેટ્રો રેલ ઓગસ્ટ 2022ના અંત સુધી શરૂ કરવામાં આવી શકે છે. પરંતુ પ્રસાશન 10 હજાર કરોડના આ પ્રોજેક્ટમાં પાર્કિંગની સુવિધા જ આપવાનું ભૂલી ગઈ છે. ગુજરાત મેટ્રો રેલ કોર્પોરેશન કે અમદાવાદ મ્યુનિસિપલ કોર્પોરેશન દ્વારા ક્યાંય પણ પાર્કિંગની સુવિધા ઉભી કરવામાં આવી નથી. મેટ્રો સ્ટેશનની નીચે આસપાસ પાર્કિંગની સુવિધા ઉભી કરવાથી પેસેન્જર્સને આરામથી મેટ્રો ટ્રેનમાં બેસી મુસાફરી કરી શકે તે માટે પાર્કિંગની સુવિધા હોવી ખૂબ જ આવશક્ય છે. પરંતુ હજી પણ મેટ્રો રેલ રૂટ પાર્કિંગની વ્યવસ્થાની જવાબદારી કોણ લેશે તે નક્કી નથી થયું, કારણ કે ગુજરાત મેટ્રો રેલ કોર્પોરેશનના PRO અને કોર્પોરેશનની સ્ટેન્ડિંગ કમિટીના ચેરમેનના નિવદેન પરથી લાગી રહ્યું છે કે બંને એકબીજા પર ઢોળી રહ્યા છે.