ગુજરાત માટે બહુ જ લાભકારક દમણ-ગંગા સાથે તાપી અને નર્મદા નદી જોડાશે : કેન્દ્રીય બજેટમાં જાહેરાત…

કેન્દ્રીય પ્રધાન નિર્મલા સિતારમણે સંસદમાં બજેટ રજૂ કર્યું છે જેમાં દેશ માટે અને ખાસ કરીને ગુજરાત માટે બહુ જ લાભકારક એવા નદીઓના જોડાણની જાહેરાત કરી હતી. આ જાહેરાતમાં કેન્દ્રીય પ્રધાને દમણ-ગંગા સાથે તાપી અને નર્મદા નદી જોડવાની જાહેરાત કરી છે. જેથી રસ્તામાં આવતી અન્ય સાત મોટી નદીઓ પણ આ પાણીથી નવપલ્લવિત થાય તેવી શક્યતા સેવવામાં આવી રહી છે. ચોમાસા સિવાય ઓછું પાણી ધરાવતી આ નદીઓમાં નર્મદા અને દમણ ગંગાના જોડાણથી બારેમાસ પાણી જોવા મળે એ દિવસો દૂર નથી. આ સાથે જ ભૂતપૂર્વ વડા પ્રધાન અટલ બિહારી વાજયેપીનું નદીઓ જોડવાનું સપનું પૂરું થશે. તેમજ ગુજરાતમાં પાણીની અછત ભૂતકાળ બની જશે.

ભારતમાં ઉપલબ્ધ જળરાશીનાં માત્ર બે ટકા જળરાશી ગુજરાતમાં ઉપલબ્ધ છે. જયારે દેશની પાંચ ટકા વસ્તી ગુજરાતમાં વસે છે. જેથી નદીઓના જોડાણની તાતી જરૂરીયાત છે. દક્ષિણ અને મધ્ય ગુજરાતનો 29 ટકા જેટલા વિસ્તારમાં જરૂરિયાત કરતાં પણ વધારે પાણી છે જેથી નદીઓના જોડાણથી જ્યાં પાણીની જરૂરીયાત છે ત્યાં આસાનીથી પહોંચાડી શકાશે. ઉપલબ્ધ જળ સંશાધનોની જળસ્રોતના સંકલિત વ્યવસ્થાપન દ્વારા સપ્રમાણમાં વહેંચણી કરી શકાશે. સાથે જ ગ્રામ્ય વિસ્તારોમાંથી શહોરી વિસ્તારો તરફનું પ્રજાનું સ્થળાંતર અટકાવી અને આર્થિક ક્ષમતા વધારી શકાશે.

દમણગંગા, તાપી અને માર્ગમાં આવતી અન્ય નદીઓનાં દર વર્ષે દરિયામાં નકામા વેડફાઇ જતાં વધારાના પાણીનો યોગ્ય ઉપયોગ થશે. સિંચાઇ તેમજ પીવાનાં પાણીની જરૂરિયાતો પૂરી પાડવા માટે અત્યંત ઉપયોગી થશે.દ્વિપકલ્પીય લિંક કેનાલનાં આયોજનમાં ગુજરાતને લાભકર્તા પાર-તાપી-નર્મદા તેમજ મહારાષ્ટ્રને લાભદાયી દમણગંગા-પીજંલ લીંક કેનાલનો સમાવેશ થાય છે.